Թիվ 26 մանկապարտեզում ավարտական հանդեսն էր

Դեռ երեք տարի առաջ ընտրության առաջ էի:

Տղաս պետք է արդեն գնար մանկապարտեզ: Ուսումնասիրեցի մոտակայքի բոլոր մանկապարտեզները` մասնավոր և պետական:

Մասնավորները աչքի էին ընկնում բարձր գներով (60-100.000 դրամ) և վատ շենքային պայմաններով: Նրանք մասնավոր տներում կամ բնակարաններում էին` սենյակները փոքր, երեխաները շատ, դաստիարակները` հիմնականում ոչ մասնագետ:
Մասնավոր մանկապարտեզների փոքր, խիտ սենյակների պատճառով` երեխաները շուտ էին միմյանցից վարակվում և հիվանդանում:

Թիվ 26 մանկապարտեզի բակը

Վերջապես` հարցուփորձից հետո, Փափազյան փողոցի վերջնամասում գտա թաքնված այս հիանալի վայրը` թիվ 26 երկհարկանի մանկապարտեզը` մեծ բակով, մեծ ննջասենյակներով և լուսավոր, բարձր դասասենյակներով:
Հանդիպումը արհեստավարժ և գործի գիտակ տնօրենի հետ կանխորոշեց ընտրությունը:

Դա երեք տարի առաջ էր...

Իսկ այսօր արդեն ավարտական հանդեսն է:

Գեղեցիկ ձևավորված դահլիճը սպասում է երեխաներին

Բոլոր երեխաները` անխտիր, գեղեցիկ են ու պայծառ: Շուտով` մի քանի ամսից, կգնան դպրոց:

Նրանք շուտվանից էին պատրաստվում այս օրվան` անգիրներ էին անում, նոր երգեր, պարեր սովորում:

Վերջին անգամ, հարազատ մանկապարտեզի լուսավոր սենյակում, նրանք շարվել են` հանդեսից առաջ:
Ճշտապահորեն սպասում են ժամը 11.00-ին, որպեսզի սկսեն ներկայացումը:

Ահա նրանք` ապագա առաջին դասարանցիները, իրենց դաստիարակների հետ

Վաղվանից նրանք արդեն մանկապարտեզի սաներ չեն համարվելու:
Մանկության մի փուլն ավարտվեց: Տիկին Հասմիկը մտահոգ է

Այս ավարտական հոսքը ինձ շատ թանկ է:

2011-ի սեպտեմբերին, եթե ծնողները, լրագրողները և պետականամետ գործիչները թույլ տային` այսօր այս մանկապարտեզի փոխարեն կլիներ էլիտար շենք: Միասնական պայքարի շնորհիվ մանկապարտեզը մնաց երեխաներին և չարժանացավ վաճառված այլ հարյուրավոր մանկապարտեզների բախտին:

Վառ գույներ, վառ հայացքներ, գեղեցիկ մեր ապագան

Հայոց եռագույնը երեխաների ֆոնին այլ շքեղություն ունի

Ծնողները շտապում են նկարել հիշարժան պահերը

Առաջին շարքում, երեխաների և ծնողների կողմից սիրված
և հարգված տնօրենն է ` տիկին Զաքարյանը

Արաբկիրի վարչական շրջանի ղեկավարը երեխաներին նվեր է
մատուցել` դպրոցական պայուսակներ և գրենական պիտույքներ

Ավարտական վկայականները բաժանված են

Տնօրենը` մայրաբար, բոլոր երեխաներին համբյուրեց և դաստիարակի` տիկին Հասմիկի հետ բաժանեց վկայականները և նվերները:
Պետության հիմքը այսպիսի մարդիկ են, իրենց գործի նվիրյալները:

Ղազարոս Աղայան, Հովհաննես Թումանյան, Խնկո-Ապեր

Բարի երթ, սիրելի երեխաներ:
Խաղաղություն և գիտելիք եմ մաղթում բոլորիդ:

Իսկ մանկապարտեզին կցանկանամ կապիտալ նորոգում` քանի որ դրա կարիքը այն իրոք ունի:

Շրջապատում ավիրված քաղաք է, նայեք

Մինչև նկարների տեղադրումը մեջբերեմ Հայաստանի ԱԺ նիստերի սղագրություններից որոշ փաստեր մանկապարտեզների վերաբերյալ`

• "Գիտության, կրթության, մշակույթի շենքերի մասով վաճառվել է, ես չեմ ասում 2001, 2003 թվականի, ես քաղաքական դիրքորոշում եմ արտահայտում, այս 10-15 տարվա ընթացքում այդ շենքերի շուրջ 1/3-ը մանկապարտեզների, 535 մանկապարտեզ է օտարվել Հայաստանում, 250 գրադարան։"

• Արաբկիր համայնքում մանկապարտեզի շենք առնելու համար այսօր պետք է վճարել 2 մլն դոլար, կամ  Երեւանի կենտրոնում, միջին շուկայական գներով։ Այն, որ նույն այդ շենքը վաճառվել է 60 հազար դոլարով, լա՛վ, բայց այսօր անհրաժեշտ է այդքան գումար։

• Միայն Երեւանի Կենտրոն եւ Արաբկիր համայնքներում 63 մանկապարտեզի շենքեր են օտարվել։ Եվ այսօր արդեն մայրաքաղաքում լուրջ խնդիր կա՝ կան երեխաներ, բայց չկան շենքեր, որպեսզի նախադպրոցական հաստատությունները կարողանան գործել։

• Ինչու՞, որովհետեւ միայն Երեւան քաղաքում վաճառվել է, 230 մանկապարտեզներից 65-ի շենքերը վաճառվել են, օտարվել են։ Եվ այսօր, օրինակ, Արաբկիր համայնքում լուրջ խնդիր կա՝ ուզում են բացել մանկապարտեզ, բայց շենք չկա։ Այսինքն, եթե նման տեմպերով գնա, մենք կարող ենք հայտնվել շատ ծանր վիճակի առաջ։

• Անթույլատրելի ենք համարում նախադպրոցական հիմնարկների եւ համայնքային ենթակայության տակ գտնվող կուլտուրմշակութային կազմակերպությունների, երաժշտական դպրոցների, մարզադպրոցների, արվեստի դպրոցների նկատմամբ միասնական կրթական քաղաքականության եւ չափանիշների բացակայությունը, որի արդյունքում, առանձին համայնքների անբարեխիղճ ղեկավարների մեղքով լուծարվում են մանկապարտեզները, վաճառվում են դրանց պատկանող շենքերն ու շինությունները։ Օրինակ, վերջին 6 տարիների ընթացքում, փակվել են 423 մանկապարտեզ կամ մանկապարտեզների ընդհանուր թվի շուրջ 35 %-ը։ Կամ մանկապարտեզ հաճախող երեխաների թիվը 104 000-ից հասել է 53 000-ի։ Ակնհայտ է, եթե այս ճանապարհով գնանք, թե ո՞ւր կգնա մեր երկիրը։

Այգեստան: Նախկին վաճառված մանկապարտեզը այսօր: Երեխաների փոխարեն վազում են տիրոջ շները

Սոսեի փողոց: Նախկին ֆուտբոլի դաշտի փոխարեն պարսիկների նոր էլիտար շենք:

Գայդառի փողոց: Նախկին մանկապարտեզի տեղը նոր էլիտար շենք

Աղբյուր Սերոբ փողոց: Նախկին Մշակույթի տան փոխարեն նոր էլիտար

Աղբյուր Սերոբ փողոց: Նախկին մսուր մանկապարտեզի վաճառված և այսօր վարձով տրվող շենքը

Փափազյան փողոց: Կահույքի ավիրված գործարանի տարածքը այսօր

Փափազյան փողոց: Մանկապարտեզի բակից թողել են ընդամենը մեկ ավտոտնակի տարածք: Մնացածը զավթել են

Փափազյան փողոց: Թիվ 26 մանկապարտեզի այսօրվա դռան վիճակը

Թիվ 26 մանկապարտեզը այսօր

Թիվ 26 մանկապարտեզի բարակ և փչող պատուհանները: Այնտեղ մեր երեխաներն են

Թիվ 26 մանկապարտեզի վիճակը այսօր

Քաղաքապետը ասում է 450 խաղահրապարակի մասին: Սա թիվ 26 մանկապարտեզի երեխաների այսօրվա խաղահրապարակն է

Քաղաքապետը ասում է 450 խաղահրապարակի մասին: Սա թիվ 26 մանկապարտեզի երեխաների այսօրվա խաղահրապարակն է

Հայերը ինչու են լքում Հայաստանը?

Մանկապարտեզի խնդիրը ոնց որ թե լուծվեց?

Թիվ 26 մանկապարտեզի խնդիրը ծագեց անսպասելի: Այն շատ բուռն քննարկվեց և ծնողների միջավայրում, և թաղամասի բնակիչների, և ֆեյյսբուքում, և իհարկե լրատվամիջոցներում` տպագիր և էլեկտրոնային:
 Սակայն կարելի է մի քանի միջանկյալ եզրահանգումներ անել:

1. Ի պատիվ Արաբկիր շրջանի վարչակազմի` Նրանք հրավիրեցին և ծնողների հետ քննարկեցին իրենց նախագիծ-ծրագիրը: Ծնողների կարծիքները լսելուց հետո, պարոն Մուշեղյանը Առավոտ թերթում հայտարարեց` "Ես որոշել էի լավ բան անել, բայց որ տեսնում եմ ժողովուրդը չի ուզում՝ ոչ մի բան էլ չեմ անելու":Իրոք շատ ողջունելի է, որ բնակիչների կարծիքները հաշվի առնվեցին շրջանի ղեկավարի կողմից:
2. Ի պատիվ մանկապարտեզի տնօրենի և աշխատակիցների` Նրանք ամեն կերպ չեզոքացրեցին ծնողների անհանգստությունը և պահպանեցին մանկապարտեզի բնականոն գործունեությունը: Ծնողներին ներկայացվեց շենքի սեյսմիկ հետազոտության արձանագրության պատճեն, որտեղից երևաց որ 2003 թվականից ի վեր շենքում առկա ճաքերը զգալի չեն աճել, և շենքը մնացել է 3-րդ կարգի վթարային: Այնտեղ առաջարկվում էր շենքը կամ ամրացնել կամ նորը կառուցել:
3. Ի պատիվ բարեխիղճ և պրոֆեսիոնալ լրագրողների` Նրանք արագ արձագանքում էին խնդրին և ներկայացնում այն: Սակայն եղան և շարունակվում են անհայտ ծագման հրապարակումներ, որտեղ խնդիրը անձնավորվում և քաղաքականացվում է: Այդ մոտեցումը շեղում է հիմնական խնդրից:
4. Ի պատիվ քաղաքացիական խմբերի` Նրանք աջակցեցին խնդրի արդարացի լուծմանը, տարածմանը և պարզաբանմանը:

Մենք բոլորս սովորում ենք քաղաքացիական հասարակության օրենքները, մեր փորձի վրա: :)))))

















Սակայն մնում է իրական խնդիրը, որից և սկսվեցին քննարկումները:

Մանկապարտեզը իրոք վերանորոգման խնդիր ունի: Կցանկանայի որ հետագա քննարկումները դրա շուրջ վարվեին, այլ ոչ թե շեղվեին: Պետք է գտնել լուծման ճանապարհներ:
Միգուցե վերականգնվի ամսեկան վարձը և այդ միջոցները ուղղվեն նորոգման? Միգուցե նախատեսել 2012 թվականի բյուջեում նորոգման ծախսեր?
Ինչ կասեք?

Արթուր Ղազարյան:

Թիվ 26 մանկապարտեզը թույլ չենք տա դառնա Նալբանդյան 106

Ծնողների ժողով թիվ 26 մանկապարտեզում

Թիվ 26 մանկապարտեզի մտահոգ ծնողները սեպտեմբերի 19-ին հավաքվել էին ծանոթանալու մանկապարտեզի շուրջ ընթացող նորություններին:

Հիշեցնեմ, որ սեպտեմբերի սկզբին 97 ծնողներ դիմել էին Երեւանի քաղաքապետարան, որպեսզի վերանորոգվի մեր մանկապարտեզը: Քաղաքապետարանից այսօր ստացվել է Երևանի Քաղաքապետարանի Հանրակրթության վարչության պետ Գայանե Սողոմոնյանի պատասխանը, ըստ որի մանկապարտեզի ծնողներին նա հավաստիացրել է, որ երեխաները հին շենքից պետք է տեղափոխվեն, միայն նոր մանկապարտեզի շենք կառուցելուց հետո:

Սեյսմիկ ծառայությունից այսօր ստացվել է 2011 թվականի մանկապարտեզի սեյսմակայունության ստուգման եզրակացությունը, համաձայն որի 2003 թվականի վերջին ստուգումից ի վեր շենքը մնացել է 3-րդ կարգի վթարային, ինչպիսին է Երևանի բնակֆոնդի 60%-ը:
Սեյսմիկի եզրակացության մեջ առաջարկում են կամ ամրացման աշխատանքներ կատարել+կապիտալ նորոգել, կամ նոր շենք կառուցել:

Ծնողները ժողովի ժամանակ այն համոզման են, որ չի կարելի ի հաշիվ այսօրվա շենքային 1800 ք.մ պայմանների և բակային 2300 քմ-ի 3 անգամ նվազման բիզնես ծրագրերով կառուցել նոր էլիտար շենք և մանկապարտեզիկ:

Մանկապարտեզի կողքը մեկ տարի առաջ ավարտվել է պարսկական էլիտար շենքի շինարարությունը և երեխաների դուրս բերում այդ ժամանակ մանկապարտեզից չի կատարվել, նրանք շարունակել են հաճախել:

Դա փաստում է, որ այսօր նոր մանկապարտեզի շենք եղածից ոչ հեռու հնարավոր է կառուցել, նորից առանց երեխաների հանման:


Արաբկիրի վարչակազմի ծնողներին ներկայացված բիզնես-ծրագրով`

1. Վատթարանում են բակի մակերեսը
2. Վատթարանում են շենքային մակերեսը
3. Կտրուկ չի աճում մանկապարտեզ հնարավոր հաճախող երեխաների թույլատրելի քանակը, այն մնում է նույնը
4. Խախտվում է նախադպրոցական կրթության մասին” օրենքի 30 հոդվածի 4-րդ կետը
5. Խախտվում է «ԵՐԵՎԱՆ ՔԱՂԱՔՈՒՄ ՏԵՂԱԿԱՆ ԻՆՔՆԱԿԱՌԱՎԱՐՄԱՆ ՄԱՍԻՆ» վարչակազմի լիազորությունները
6. Այսօրվա մնակապարտեզի շենքը այդ տարածքով համապատասխանում է 100 երեխայի նորմաներին և հաճախում է 100 երեխա: Որևէ նվազում թե բակի, թե շենքի կխախտի այդ նորմաները: (ՀՀ առողջապահության նախարարի թիվ 857 հրաման,2002 թ.)
7. Իրականացվում է բիզնես-ծրագիր այլ ոչ թե նորոգում:

Այսօր ծնողները դիմել են արդեն 4 լրատվական միջոցներին: Բազմաթիվ նամակներ են գրել տարբեր ղեկավար օղակներին: Ֆեյսբուքյան շահագրգիռ խմբեր են արդեն ներգրավվում մեր պայքարին:

Ծնողները իրոք տրամադրված են հավասարակշիռ և ապագային միտված լուծման, այլ ոչ թե ակնթարթային բիզնես ծրագրերի իրագործմանը: